Алексеевский ставропигиальный женский монастырь

Москва, 2-й Красносельский пер., д.7, стр.8

http://www.hram-ks.ru

Русская Православная Церковь

Московский Патриархат

Версия для печати

Молитвослов

Дополнение к службе святой равноапостольной Марии Магдалине

Вечерня

На Господи воззвах: три стихиры Минеи, Гл.8, подобен: «О преславного чудесе»
Ины стихиры, глас и подобен тойже:
О, преславного чудесе, / како жена немощная / любовию мужество велие восприяла еси / страх естества отринувши. / За Христом до конца последовала еси, / у Креста Божественному Страдальцу сострадавшая / и плачущи во гроб Спасителя полагавшая, / о, Марие Магдалини преславная, / моли о нас Милостиваго Господа, // Егоже возлюбила еси.

На литии стихиры самогласны, глас 1:
Приидоша на гроб Магдалина, и другая Мария ищуще Господа, и ангела видеша яко молнию седяща на камени, и глаголюща им: что ищете живаго с мертвыми? воскресе, якоже рече: в Галилеи Его обрящете. К Нему же возопиим: воскресый из мертвых, Господи слава Тебе.
(стихира из Цветной Триоди)

Слава и ныне: глас тойже
Мироносицы жены, ко гробу что приидосте? что ищете живаго в мертвых? Воскресе Господь, дерзайте, вопиет ангел.
(стихира из Цветной Триоди)

На стиховне: гл.8
Ко гробу Спасителя прежде всех притекшая,/ и весть о Воскресении приимшая, / яко апостол апостольскому лику явилася еси, / Христово Воскресение возвещающи, /Магдалини Марие прехвальная, / моли присно за чтущия тя.

Стих: Во всю землю изыде вещание их и в концы вселенныя глаголы их
Коль многое множество благости Твоея, Господи, / юже явил еси рабе Твоей, / восклицала еси, Марие прехвальная, / силою Христовою исцеленная / и Небесною благодатию напоенная. / Темже моли о нас, чествующих тя, // да научимся за вся Творца благодарити.

Стих: Небеса поведают славу Божию, творение же руку Его возвещает твердь
Веселися и радуйся о Господе, / ученице Христова верная, / Магдалини Марие всечестная, / благоуханный цвете добродетелей. / Воскресение Христово видевше, / славы Божия явилася еси проповеднице. / Любовию святою пламеневшая, / пламенем веры сердца озаряла еси. / Еяже молитвами, Владыко Господи, // сподоби нас Небеснаго Царствия Твоего.

Слава: из минеи
И ныне: из минеи

По 1-м стихословии седален, глас 2:
Уловивши языки, Марие славная, и научивши со Отцем и Духом Христа Спасителя славити, богоприятными твоими молитвами почитающия тя утверди в вере и любви Христовой.

Слава и ныне, глас тойже:
Божественнаго естества общницы быхом Тобою, Богородице Приснодево: Бога бо нам воплотившагося родила еси. Темже по долгу тя вси благочестно величаем.
(Минея общая)

По 2-м стихословии седален, глас 6:
К стопам Иисусовым припавшая и Воскресением Христовым просвещенная, Марие честная, сподоби и нас твоим предстательством со Христом сочетатися.

Слава и ныне: глас тойже.
На тя упование, Богородице, возложихом чаяния, да не отпадем, спаси нас от бед, Помощнице недоумеемым, и сопротивных советы разори: Ты бо еси наше спасение, Благословенная.
(Минея)

По полиелеи седален, глас 1.
Приидоша на гроб Магдалина, и другая Мария ищуще Господа, и ангела видеша яко молнию седяща на камени, и глаголюща им: что ищете живаго с мертвыми? воскресе, якоже рече: в Галилеи Его обрящете. К Нему же возопиим: воскресый из мертвых, Господи слава Тебе.
(стихира из Цветной Триоди)

Слава и ныне: глас тойже
Радуйся, Богородице Дево, радуйся, похвало всея вселенныя, радуйся, Пречистая Мати Божия, Благоcловенная.
(Минея)

По 50-м псалме стихира, глас 6
славник с Господи воззвах

На Хвалитех: гл.8, подобен «Что вы наречем…»

Что тя наречем, Марие Магдалини славная, / лучу ли Христа, Солнца Правды, / просвещающую всех светом невечерним / и сердца хладная согревающую, / во тьме седящим неведения путь указующую, / и блистающую зарею духовною. / Не остави и нас, тя прославляющих // и моли спастися душам нашим.

Что тя наречем, Марие Магдалини прехвальная, / звезду ли, сияющую любовию, / и молитвами твоими нас озаряющую, / реку ли, жаждущия души напояющую / водою спасительныя веры / и надеждею на милость Творца./ Темже и нас чтущих тя // научи любовию ко Христу прилеплятися.

Что тя наречем, Марие Магдалини честная, / ластовицу ли небесную, / вся земная оставившую / и к горнему устремившуюся, / за Христом Спасителем последовавшую / и с любовию Ему служившую. / Темже и нас молящихся тебе // сподоби Христу послужити.

Слава, глас тойже: Мариины слезы не всуе проливаются тепле, се бо сподобися и учащих ангелов, и видения Самого Иисуса: темже и отсылается не прикасатися Христу. Но обаче проповедница посылается Твоим учеником, имже благовествование носящи, еже ко Отеческому жребию восход возвещающи: с неюже сподоби и нас явления Твоего, Владыко Господи.
(Евангельская стихира 8-я)

И ныне, глас тойже: Владычице, прими молитвы раб Твоих и избави ны от всякия нужды и печали.